Маж вооружен до заби како Рамбо се шетал низ улици во Радовиш
Во Радовиш се одиграла вистинска драма кога 49-годишен жител, облечен во воена униформа и вооружен со пиштол и пушка, шетал по улиците и предизвикувал вознемиреност кај граѓаните.
Како што информира Министерството за внатрешни работи, полициски службеници од СВР Струмица – ОВР Радовиш го лишиле од слобода А.У., кој на улицата „Шаин маале“ бил забележан со ремен на кој имал закачен пиштол, држел пушка во рацете и носел дрвена палка и лисици. Присуството на лицето во ваква опрема создало паника кај жителите.
При обидот да биде приведен, осомничениот ги фрлил предметите и се обидел да побегне, но полициските службеници брзо реагирале и успеале да го фатат. На местото биле пронајдени и одземени сите фрлени предмети, меѓу кои: пушка, ремен, кожна футрола со лисици, метална палка, сигнални куршуми, рамка со капси, пиштол и други слични предмети.
А.У. е задржан во Полициската станица во Радовиш, а за целиот случај е известен јавен обвинител од Основното јавно обвинителство. По целосно документирање на случајот, против него ќе биде поднесена соодветна кривична пријава.
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа
