Тошковски за сообраќајката во која загинаа 3 лица: Еден од возачите возел со огромна брзина

Голема неприлагодена брзина е причината за трагедијата која вчера се случи на патот Кичево-Гостивар, а во која загинаа три лица, изјави денеска министерот за внатрешни работи, Панче Тошковски.

„Три лица го загубија животот. Според првичните информации кои ги добив, станува збор за огромна неприлагодена брзина од страна на еден на учесниците во сообраќајот, кој за жал, е починат. Бројот на сообраќајни жртви во оваа година во првото тромесечје е сличен како и бројот на жртви лани. Со тоа што можам да кажам дека бројките се катастрофални во споредба со европските стандарди“, дополниТошковски.

Тој упати апел до возачите.

„Да ги почитуваат сообраќајните правила, дозволената брзина, бидејќи експертите тврат дека и кога се управува возило, а тоа е над 70 км/час, а има челни удари како вчера, можноста за преживување е нула“, додаде тој.

За потсетување, извршен е увид на местото на сообраќајната несреќа што синоќа се случи на патот Кичево - Гостивар во која загинаа три лица, а осум беа повредени.

Државното јавно обвинителство утринава соопшти дека од местото на несреќата подигнати се траги кои ќе бидат предмет на вештачење, а телата на починатите се дадени на обдукција и дадена е наредба за испитување на евентуално присуство на алхокол или други супстанции кај повредените. 

- По насоки на јавниот обвинител продолжуваат да се преземаат и други дејствија, информираат од Јавното обвинителство.

Сообраќајната несреќа се случи меѓу Кичево и селото Трапчин Дол и во неа, како што синоќа за МИА изјави портпаролот на СВР Охрид, Стефан Димоски, учествувале три возила.