Фон дер Лајен забранува социјални мрежи за деца - промените доаѓаат наскоро

Претседателката на Европската комисија, Урсула фон дер Лајен, најави дека до крајот на годината ќе биде формирана експертска група која ќе предложи воведување на возрасна граница за користење на социјалните мрежи во Европската Унија.

Зборувајќи пред Европскиот парламент во Стразбур, фон дер Лајен ја спореди потребата од регулација на дигиталните платформи со традиционалните забрани за тутун и алкохол кај младите.

„Во мое време, како општество, ги учевме нашите деца дека не треба да пушат или пијат до одредена возраст. Мислам дека е време да го сториме истото и со социјалните мрежи,“ рече таа.

Претседателката истакна дека се зголемува загриженоста кај родителите заради неограничениот пристап на децата до интернет, особено поради алгоритмите кои, според неа, ги искористуваат детските слабости за да го зголемат времето поминато онлајн.

„Кога станува збор за безбедноста на нашите деца на интернет, Европа им верува на родителите – а не на профитот,“ додаде Фон дер Лајен.

Регулативата сè уште е во подготвителна фаза, но најавите на Комисијата отвораат сериозна европска дебата за етичките и правните аспекти од користењето на дигиталните платформи од страна на малолетници.