Демири – Ди Џовани: УНИЦЕФ со поддршка за имунизација кај децата

Министерот за здравство Илир Демири денеска оствари прва официјална средба со претставничката на УНИЦЕФ во земјава, Патриција Ди
Џовани на која што разговараа за заедничките активности за зголемување на ефикасноста и ефективноста на здравствените услуги.

Демири, ги информираше претставниците од УНИЦЕФ за моменталната состојба со епидемијата на голема кашлица во градот Скопје и за препораките што се донесени со цел сузбивање на епидемијата.

На средбата, беше искажана загриженоста во однос на нискиот опфат на вакцинација против голема кашлица, а исто така се дискутираше и за вакцинирањето со другите вакцини од Задолжителниот календар на имунизација. УНИЦЕФ ја изрази својата подготвеност да продолжи со поддршка за зајакнување на здравствениот систем и спроведување комуникациски активности за да се врати довербата во здравствениот систем и вакцините. Во тој контекст, значајно е и воведување на систем за управување со дезинформации и погрешни информации во врска со вакцините и процесот на вакцинација во Министерството за здравство.

Демири и Ди Џовани разговараа и за годишниот Планот за соработка за 2024-та година во делот на имплементација на перинаталниот мастер план, педијатрискиот мастер план, како и за другите компоненти од здравствениот систем, со фокус на мајки и деца.