Лимани: Значително зголемување на социјалната помош и нови мерки за лицата со попреченост

Министерот за социјална политика, демографија и млади, Фатмир Лимани денеска учествуваше на петата трибина во рамките на Платформата „100% Посветено за тебе“  со фокус на социјалната и здравствената во нашето општество.

Во одговор на прашањето кои политики и мерки ќе ги преземе Министерството за социјална политика, демографија и млади со цел поголема поддршка и инклузија на ранливите категории на граѓани во општеството, министерот се осврна на конкретни мерки кои се планирани во периодот пред нас.

„Како ресорно министерство одговорно за испорака на права и услуги од социјалната заштита наменети за  ранливите категории на граѓани, а со цел подобрување на квалитетот на живот на истите, пристапивме кон креирање на конкретни политики и мерки. Зголемените цени и влошениот животен стандард, секојдневно продуцираат уште поголема социјална нееднаквост. Затоа планираме: зголемен надомест за социјална заштита односно зголемување на гарантирана минимална помош за 10%, на посебниот додаток за 30%, на паричната помош за квадриплегија за 50% , за потполно глуви лица за 20%, на правото на надоместок на плата за скратено работно време за родители поради нега на дете или лице со телесна и ментална попреченост и најтешки хронични заболувања за 30% и ново право на парична помош на лицата без горни екстремитети,“ истакна министерот Лимани.

„Ќе предвидиме програма за вработување на најмалку едно лице со попреченост во сите јавни институции над 50 вработени. Ќе предвидиме посебни програми за лицата со попреченост што ќе започнат сопствен бизнис. Како и програма за вработување на деца без родители и родителска грижа по наполнување на 18 години,“ рече Лимани.

Тој се осврна и на пензиските политики на Владата и враќање на достоинството на пензионерите, кои во првите 100 дена од владата добија линеарно покачување од 2.500 денари, а ќе добијат уште едно такво во месец март.