Филиповски: Популарната „Дупка“ во Ново Лисиче ќе го задржи автентичниот изглед
Кандидатот на СДСМ и коалицијата за градоначалник на општина Аеродром, Александар Филиповски изјави дека спортско – рекреативниот центар во Ново Лисиче, популарната „Дупка“, каде што вечерва социјадемократите ќе одржат митинг, ќе го задржи својот автентичен изглед.
-Внатрешните простории беа обновени пред неколку години и како ново општинско раководство, ќе се грижиме за тековно одржување на овој спортски центар, истакна Филиповски, додавајќи дека ВМРО – ДПМНЕ и нивниот кандидат Тимчо Муцунски предвидуваат менување на изгледот на популарната „Дупка“, со што, како што рече, одат против интересите на локалното население.
-Овој дел е белег на Ново Лисиче. Симбол на маалскиот живот и јавен простор кој ги поврзува сите генерации. „Дупка“ останува отворен простор. Нема да дозволиме никакво покривање или негово затворање, затоа што граѓаните го паметат и го сакаат овој рекреативен центар токму во ваква состојба, рече Филиповски.
Тој нагласи дека на тој простор, во летниот период се организираат и културни настани и посочи дека уште повеќе ќе се користи овој центар, како за спортски турнири, театарски фестивали, така и за концерти, перформанси за млади и друго.
Вечерва, од 19:00 часот, СДСМ и коалицијата ќе организираат и граѓански собир на „Дупка“, каде што граѓаните од Ново Лисиче и овој дел од општината, ќе можат да ги слушнат проектите за развој на населбата, информираат од партијата.
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа