ВМРО-ДПМНЕ: Економските мерки даваат резултати, платите растат, инфлацијата се намалува

Добро проектираните економски мерки и политики на Владата, ги даваат посакуваните резултати, велат од ВМРО-ДПМНЕ.

„Полека, но сигурно почна стабилизирањето и заживувањето на економијата, расте производството, се зголемуваат платите, се намали инфлацијата, се зголемува потрошувачката и куповната моќ на граѓаните.

Тоа покажува дека сега, споредено со периодот на власт на СДС, граѓаните имаат повеќе пари и со тоа купуваат повеќе. Дека е така потврдуваат и економските експерти кои велат дека како резултат на повисоките плати и пензии, се зголемува личната потрошувачка на граѓаните.

Имено, за една година власт на ВМРО-ДПМНЕ реалната плата двојно порасна, отколку за седум години власт на СДС.

Бројките покажуваат дека во период од јули 2024 до јули 2025 година, растот на реалната плата е 6,7 проценти, додека во периодот на власт на СДС од јули 2017 до јули 2024 година, растот бил само 3,5%.

Колку за појаснување, реалната плата е вистинската куповна моќ на платата, значи не е номинален износ, туку вредносен.

Од друга страна, споредено за истите овие периоди, инфлацијата е намалена за цели 30%.

Во периодот јули 2024 до јули 2025 година просечната стапка на инфлација е 3.6%, додека во период од јули 2017 до јули 2024 година, просечната стапка на инфлацијата е 4.8%.

Овие бројки јасно покажуваат дека стопанството се развива, инфлацијата е стабилизирана и под контрола, платите растат, граѓаните имаат повеќе пари и живеат подобро.

Со ВМРО-ДПМНЕ на власт народот го добива заслуженото, додека со СДС единствено кои добро живееја беше нивната политичка елита и нивните главни тендераши кои енормно го зголемуваа богатството.

Државата оди напред, промените ја трансформираат Македонија, има сеопфатен раст и развој кој го чувствува секој граѓанин“, стои во сооптението на ВМРО-ДПМНЕ.