Таравари за пациентот кој почина на Кардиохирургија: Ако има пропусти ќе има одговорност

Министерот за здравство Арбен Таравари е јасен дека ќе се бара одговорност доколку имало пропуст или грешка за пациентот Т.А. од Скопје, кој почина на Клиниката за кардиохирургија.

- „Аневризма на аорта е сериозна дијагноза. Сè уште не сум го прочитал извештајот. Ќе треба да има веднаш и стручна комисија. Според моите информации, едната сала работела, меѓутоа кога ќе го видам извештајот ќе знам точно. Сите сме потенцијални пациенти, на сите може да ни се случи ова, но за среќа во Македонија имаме три клиники каде што се прават вакви операции“, изјави министерот за здравство.

За тоа дали ќе се бара одговорност и дали инспекција ќе биде пратена и на приватната клиника од каде што пациентот бил вратен оти кај нив не можело да се оперира на товар на Фондот Таравари рече дека секако треба доколку тврдењето се покаже како вистинито.

Инаку, Државниот санитарен и здравствен инспекторат (ДСЗИ) изврши вонреден инспекциски надзор во ЈЗУ УК за државна кардиохирургија – Скопје.

- На 08.04.2025 година, пациентот Т.А. беше примен во ЈЗУ УК за државна кардиохирургија – Скопје како итен случај по упат од ЈЗУ ГОБ 8 Септември. Дијагнозата беше дисекција на аорта (Stanford type B). Пациентот бил со силна епигастрична болка и висок крвен притисок при прием. Лабораториските испитувања и терапијата ја стабилизирале неговата состојба, но поради недостаток на стентови за TEVAR интервенција и реновирање на операционата сала, му биле предложени второ мислење и лекување во странство. Во текот на престојот на клиниката, пациентот развил митрална регургитација, што дополнително го зголемило ризикот од компликации. На семејството им била понудена опција за лекување во странство, која ја прифатиле. За жал, пациентот доживеал нагло влошување на здравствената состојба и починал на 09.04.2025 година. Иако пациентот бил лекуван конзервативно, со оглед на неговата состојба, стручниот колегиум на клиниката го потврдил како случај на некомплицирана дисекција на аорта. Врз основа на тоа, не беше препорачана хируршка интервенција поради висок ризик за живот. Семейството одбило патоанатомска обдукција, а исто така беше предложена јавна набавка за стентови за TEVAR интервенција по завршувањето на реновирањето на операционата сала. Министерството за здравство ќе формира комисија за стручен надзор во однос на постапките на здравствените работници во овој случај, велат од таму.