Страшна несреќа го потресе Скопје - Жена прегазена на Партизанска

Уште една страшна несреќа ја потресе Македонија, кога жена беше прегазена на булеварот Партизански Одреди во Скопје.

Во СВР Скопје вчера од ГОБ „8 Септември” е пријавено дека кај нив е донесена 68-годишната З.А. од Скопје, која била повредена во сообраќајна несреќа која се случила на булеварот „Партизански одреди”.

На пензионерката и биле констатирани тешки телесни повреди откако во неа удрило патничко возило „Опел” со скопски регистарски ознаки, управувано од страна на 26-годишниот В.Ј. од Скопје.

Известен е јавен обвинител и против В.Ј. ќе биде поднесена кривична пријава, соопшти Министерството за внатрешни работи.

Инаку, и покрај засилените контроли и големите казни, сепак Партизанска е една од точките во градот каде за жал најчесто се газат пешаци. Случајот кој ја крена цела Македонија се случи токму на Партизанска, кај Силбо, на крајот од Јануари, кога младата модна дизајнерка Фросина Кулакова беше прегазена и усмртена на пешачки премин. Возачот Васил Јованов без возачка и со голема брзина ја усмрти младата девојка.