Владиката Петар го допре дното во Австралија

Срамен, скандалозен и нималку христијански потег на Владиката г. Петар, со кој го допре дното на поделбите меѓу македонците во Австралија. Австралиско-новозеландскиот администратор, Владиката г. Петар му забранил на својот свештеник да погреба Македонка, само затоа што таа не била дел од неговата, туку од црквата со која управува Владиката г. Тимотеј, па погребот го извршил свештеник на Украинската Црква.

Настанот пред два дена се случил во Перт во Австралија.

-Тоа е дното до кое не донесе Владиката Петар. Да одбиеш да погребаш македонски верник, само затоа што тој не ја посетувал твојата, туку црквата на другиот Архиереј од истата црква, во најмала рака е срамно и во себе нема ништо христијански. Тоа е резултатот од поделбите што ги произведува Владиката Петар веќе две децении во Австралија, револтирано реагираат Македонците на Австралискиот континент.

Но, што точно се случувало пред два дена во Перт Австралија.

Во овој град во Австралија има две цркви на Македонската Православна Црква-Охридска Архиепископија. И двете се викаат Свети Никола, но едната е под ингеренции на Владиката г. Петар, а друга под ингеренции на Владиката г. Тимотеј, кој пред година и половина беше назначен за администратор на македонските црковни општини кои се под јуриздикција на Синодот на МПЦ. И во двете цркви служат двајца свештеници, под две управи. Едниот под Владиката г. Тимотеј, а другиот под владиката г. Петар.

Свештеникот Станко Јовановски кој служи во црквата св. Никола, која е под надлежност на г. Тимотеј морал да замине на пат за Македонија. Бидејќи ќе бил отсутен повеќе од неколку денови се договори со свештеникот Веско Каранфиловски од другата црква Св. Никола, која е под ингеренции на Владиката г. Петар, да го замени ако има некоја неодложна потреба.

Во меѓувреме починала една Македонка која требало да биде погребана. Врз основа на договорот меѓу светшениците, погребот требало да го изврши свештеникот Каранфиловски и тука се случува скандалот. Свештеникот одбил да го изврши погребот, со образложение дека Владиката г. Петар не му дозволува.

- Нема што мојот поп да погребува таму некој од друга црква, било обрезложението на г. Петар, кога свештеникот побарал дозвола да ја погреба Македонката која починала.

Во таква ситуација, семејството на починатата Македонка, при две македонски цркви во Перт, побарало опелото и погребот да го извшрши свештеник на Украинската црква, кој нормално без никакви проблеми тоа и го сторил.

Претседателот на Македонската црковна општина за Западна Австралија Перт, Крис Ангелковски го потврдува настанот кој се случил, потенцирајќи дека ова е грозен и антимакеоднски потег на владиката г. Петар.

-Една наша членка и верничка Јана Филевичина почина пред 4 дена. Кога го побаравме попот Веско да ни служи на погребот тој ни одговори дека тоа не може да го стори. Не знаеме зошто. Не знаеме дали тој самиот решил така или му било наредено од Јовица Симоновски, заменикот на владиката Петар или од самиот владика Петар Каревски. Бевме приморани да викнеме украински поп за да ја погребе жената. Има ли поголеми антимакедонски срамоти и погрозни глупости од ова што го прави Петар Каревски и неговите попови, вели Ангелковски.

За целиот овој случај ќе биде известен и Синодот на МПЦ-ОА