Груевски го честита Божик: Нека има мир во нашите срца!

Mакедонскиот премиер Никола Груевски, по повод големиот христијански празник – Божиќ денеска упати честитка до поглаварот на Македонската Православна Црква – Охридска Архиепископија, Архиепископ Охридски и Македонски г.г. Стефан и до сите православни верници од Република Македонија и дијаспората.

- Овој светол и величествен празник со сета своја големина и духовност не потсетува на вредностите на кои не учи христијанството, на Божјите дела и човекољубието кои преставуваат сечовечка универзална придобивка и вредност. Имајќи го Бог при себе, имаме вера и имаме надеж. Имајќи го Бог со себе, имаме поткрепа во сите тешки моменти да истраеме и во сите радосни моменти да имаме со кого да ги споделиме и на кого да се заблагодариме. Божиќ е празник на љубовта, на надежта и семејните вредности. Тоа е празник на радоста и достоинството. Токму затоа, како што налага верата и како што тоа го правеле нашите предци години и години претходно, да ги отвориме широко нашите порти за светлината која доаѓа на овој прекрасен празник. Да бидеме покорни верници и да правиме добри дела. Да си ги сакаме нашите најблиски, нашето семејство, нашите пријатели, нашата земја. Да се почитуваме еден со друг и заедно да работиме за добробит на нашиот народ и Република Македонија. Со Господа напред и вечна благодарност за неговата милост, во радост да го прославиме Христовото раѓање, стои во честитката од Груевски.

Тој им посака на сите граѓани во Република Македонија и на сите припадници на македонската дијаспора добро здравје, успех во работата и благосостојба.

- Нека има мир и љубов во нашите срца! Нека е честит големиот христијански празник ! ХРИСТОС СЕ РОДИ !, се вели во честитката од Никола Груевски,  претседател на Владата на Република Македонија.