Нови детали за сообраќајката на излезот од Битола: Шоферот на автобусот е хоспитализиран на Хирургија

Директорката на Клиничката болница во Битола, д-р Елизабета Ивановска за „Прес24“ изјави дека во болницата поради сообраќајната несреќа на излезот од Битола, досега поминале над 20-тина пациенти. Меѓутоа, како минува времето, се повеќе лица барале помош од докторите. 

На Хирургија до овој момент биле прегледани седум пациенти, меѓукои и шоферот, којшто е единствениот хоспитализиран во овој оддел.

13 пациенти биле прегледани од ортопед, но на овој оддел нема хоспитализирани, бидејќи сите имале телесни повреди. 

Според официјални информации, девет пациенти биле насочени и на неврохирургија, каде им е пружена неопходна медицинска помош.  

Директорката кажа дека сите лица кои поминале во болницата поради сообраќајката се надвор од животна опасност. 

Како што информиравме претходно, едно лице го загуби животот, а дваесеттина лица се повредени во тешка сообраќајна несреќа што попладнево се случила на регионалниот патен правец Битола-Демир Хисар.

Според првичните информации, станува збор за судир меѓу патничко моторно возило и автобус на компанија која превезувала работници од Битола кон населените места во Демир Хисар. Во директниот сообраќаен судир меѓу патничкото моторно возило и автобусот на излезот од Битола, на местото на сообраќајката загинал возачот на патничкото моторно зозило, тешко е повреден совозачот, а повредени се и патниците во автобусот.

Се очекува СВР Битола да излезе со официјално соопштение за тешката сообраќајна несреќа во Битола.