ФОТО: Граѓани со чекани удрија по споменикот на Цар Душан

Група од 20-тина граѓани синоќа го оштетила споменикот на Цар Душан на Мостот на цивилизациите во Скопје, објавува ТВ „Алсат-М“

Според информациите на Алсат-М, групата граѓани со чекани се обидела да го урне споменикот, но, успеала само да го оштети. 

Македонските медиуми кои известуваат на албански јазик вчера јавија дека преку социјалните мрежи се организира протест за уривање на споменикот на Цар Душан во Скопје. 
Извесен Африм Гаши преку социјалните мрежи праќа покани до корисниците.

„Почитувани граѓани на Република Македонија Ве поканувам сите вас, утре во 12.00 часот, да ми се придружат во намерата да го отстраниме споменикот на Цар Душан, кај мостот Око на плоштадoт Македонија. Како граѓанин кој сака да помогне на владата на Македонија, градот Скопје и на Општина Центар, ги поканувам и сите други граѓани, заедно да го отстраниме споменикот поставен на сред Скопје без дозвола и нарачка од горенаведените институции. Со ова писмо се обраќам и до сите пишани и електронски медиуми да го проследат настанот, при што длабоко сме уверени дека настанот е за добробит на сите граѓани на Македонија и за посветла иднина на нашата земја“ – се вели во повикот.