Мало дете остана сираче: Полицијата со детали за кобната сообраќајка кај Удово
Голема трагедија вчера ја потресе Македонија, полицијата денеска излезе со детали. Околу 07 часот на магистралниот патен правец Демир Капија – село Удово, кај местото викано Св.Петка, се случила сообраќајна незгода во која возило „Ауди А4“ со германски регистарски ознаки, управувано од 46-годишниот Д.С. од Србија и возило„Фиат Сеиченто“ со скопски регистарски ознаки, управувано од 41-годишниот Н.П. од Скопје, удриле во Автобус „ЗЕТРА“ со струмички регистарски ознаки, сопственост на ДОО „Струмица Експрес“, а управуван од 60-годишниот Ѓ.В. од Струмица.
За жал, во незгодата на лице место починале возачот на „Фиат Сеичентото“, Н.П. и сопатникот Б.П. (31), додека со тешки телесни повреди се здобил нивниот седумгодишен син. Истиот со возило на Итна медицинска помош бил пренесен во ЈЗУ-Велес, од каде поради сериозноста на повредите е препратен во Ургентен центар(на КАРИЛ)-Скопје.
Сопатничката во возилото „Ауди А4“, 37-годишната Н.С. од Германија, се здобила со тешки телесни повреди и е задржана на лекување во болницата во Велес.
Увид на местото на настанот извршиле Јавен обвинител и увидна екипа од Полицијата од Валандово. Од 07.00 до 12.40 часот сообраќајот во двата правци беше во прекин, односно беше пренасочен и се одвиваше од Гевгелија преку Богданци, крстосница Дојранска за Струмица и обратно.
По наредба на Јавен обвинител во полиција задржан е 46-годишниот С.Д. од Србија заради обезбедување негово присуство на постапка која се води за сообраќајната незгода.
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа