Пијани дивееле на улиците - седуммина повредени во Скопје

На подрачјето на Град Скопје изминатиот ден се случиле вкупно 11 сообраќајни незгоди. Шест се со последица материјална штета, пет поминале со телесни повреди. Со повреди се здобиле седум лица.

Како што информира за МИА главниот инспектор Сашо Дамјановски од СВР - Скопје, во текот на изминатите пет дена од страна на сообраќајната полиција, откриени се поголем број на прекршоци.

Двајца возачи ги управувале своите возила под дејство на алкохол и се исклучени од сообраќај, а тројца возачи поминале на црвено светло на семафорите. Шест возачи за време на управување на моторните возила не го користеле сигурносниот појас или го користеле мобилниот телефон. Затекнати се 40 непрописно паркирани возила. Седум лица управувале возила без да поседуваат возачка дозвола, а 10 возачи го управувале возилото по истекот на сообраќајната дозвола.

Со помош на специјалното возило „пајак“, отстранети се 63 возила.

Во делот на превентивните активности, денеска ќе се одржат едукативни работилници со учениците од четврто одделение во ОУ „Страшо Пинџур“ и со ученици од второ и четврто одделение од ОУ „Димитар Поп Беровски “, општина Ѓ.Петров.