Димовски: Фабриката за шински возила од Велес ќе се припои кон МЖ - Транспорт
Фабриката за шински возила од Велес ќе се припои кон МЖ - Транспорт со што ќе се надминат неколкудецениските проблеми, рече попладнево на 99. собраниска седница пратеникот од ВМРО-ДПМНЕ Илија Димовски.
Реплицирајќи му на Марјанчо Николов од СДСМ кој предочи дека вработените од Фабриката и денеска штрајкуваат, барајќи си ги заостанатите 2,5 плати, но и натамошна редовна исплата на примањата, Димовски потенцира дека одлуката за припојување на Фабриката кон МЖ - Транспорт е веќе усвоена на владина седница, а ќе се реализира преку законски измени на следната собраниска седница, в понеделник, на 4 април.
- На следната собраниска седница, во понеделник, ќе има измени на закон со кои ќе се овозможи овие луѓе да добијат работа и сукцесивно, за краток временски период Фабриката за шински возила да се припои кон МЖ - Транспорт со што конечно, ќе се надминат неколкудецениските проблеми. Изработен е акциски план, се прави проценка и ревизија на вредноста на имотот, напомена Димовски.
Собранието во рамки на седницата ги донесе измените на Законот за заштита на природата, на Законот за управување со отпадот и на Законот за сигурност во железничкиот систем, сите по скратена постапка, но не ги усвои измените на Законот за организација и работа на органите на државната управа, по скратена постапка, за кои беше потребно двотретинско мнозинство.
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа