Притвор за младото момче кое усмрти велосипедист на Партизанска

СВР-Скопје поднесе кривична пријава против 20-годишниот Е.Т. од Скопје поради тешки дела против безбедноста на луѓето и имотот во сообраќајот, а од страна на судија на претходна постапка одредена му е мерка притвор во траење од 30 дена.

Како што соопшти денеска МВР, на 25 овој месец околу 14 часот во Скопје на крстосницата од булеварот „Партизански Одреди“ и улицата „Френклин Рузвелт“ се случила сообраќајна незгода помеѓу патничко возило „Ауди А4“ со скопски регистерски ознаки управувано од пријавениот, велосипед „спринт“ управуван од Нинослав С. (65) од Скопје и автобус. Во незгодата, се појаснува, со тешки телесни повреди се здобил велосипедистот кој со возило на брза помош бил пренесен во Ургентниот центар-Скопје, каде што околу во 18,30 часот им подлегнал на повредите.

Во периодот од 25 до 28 овој месец до 07 часот од страна на СВР-Скопје спроведени се зајакнати контроли во делот на патниот сообраќај при што преземени се вкупно 473 мерки и притоа издадени се вкупно 214 платни налози за наплата на глоба и 259 покани за наплата на глоба.

Во соопштението од МВР се наведува дека 145 возачи ја пречекориле брзината на движење и тоа за 111 евидентирано е пречекорување на брзина во населено место дo  30 км/ч, а за 35 пречекорување на брзина во населено место над  30 км/ч така што по однос на овие прекршоци издадени се 111 платни налози за наплата на глоба и 35 покани за наплата на глоба.   Алкотестирани се 560 возачи и кај 61 лице утврдено е присуство на алкохол, додека двајца возачи одбиле да се алкотестираат. По однос на овој прекршок 63 возачи се исклучени од сообраќај, времено се одземени 51 возачка дозвола и издадени се 63 платни налози за наплата на глоба. Покрај ова, евидентирани се 67 неправилно паркирани возила за кои се издадени 64 покани за наплата на глоба како и три платни налози за наплата на глоба. Кај 24 лица за кои се издадени исто толку платни налози утврдено е дека управувале без положен возачки испит, 44 возила се затекнати без валидна регистрација, за што се издадени исто толку платни налози, а 24 возачи минале на црвено светло и за нив се издадени 24 платни налози.

Со специјално пајак возило отстранети се вкупно 95 непрописно паркирани возила на тротоар, пешачка зона, обележан пешачки премин и велосипедска патека. Евидентирани се и четири прекршоци што ги направиле пешаците за што се издадени четири покани за наплата на глоба.