Линијата Охрид-Подградец ја искористиле над 1.000 туристи - Струга надвор од плановите за пловидба од технички причини

Околу 1.000  домашни и странски туристи ова лето почнувајќи од средината на месец јуни, до средината на овој месец ја искористиле бродската линија Охрид-Поградец за да го прошетаат Охридско, заобиколувајќи го од двете страни на езерото. Се работи за чартер линија која е активна само во текот на туристичката сезона, бидејќи без туристи, во останатиот мртов период од годината бродовите се укотвени на охридското пристаниште.

– Да бидеме реални и да ги правиме нашите постапки во рамките на реалните можности и очекувања. Нема потреба да идеализираме сега ќе отвориме граничен премин преку цела година, зошто?, вели за Алфа, Горан Устијаноски од охридската капетанија.

Иако распослана на брегот на Охридското езеро, Струга не е вклучена во сезонската линија до Поградец бидејќи овој крајезерски град нема соодветно пристаниште, велат од капетанијата.

– Во однос на Струга,таму ограничувачки фактор е пристапот за бродовите. Тоа е ограничувачки фактор не само за линијата со Албанија туку и за некаква конекција Охрид-Струга. Не постои никаква друга позадина затоа што денеска брод не оди во Струга. Причината е чисто техничка, потенцира Устијаноски.

Претседателот на ХОТАМ смета дека долж целото крајбрежје треба да има 5-6 пристаништа и далеку поголем број пловила.

Од капетанијата појаснуват дека дозволата за изградба на пристаниште на територијата на еден град ја издава самата општина по претходно добиено мислење од капетанија.