Економска анализа на ЕК: Македонија - единствена светла точка на Балканот

Европската комисија оцени дека надолниот тренд на балканската економија се должи на забавениот раст и  рецесијата во Србија и Албанија во изминатите неколку месеци.

Со тоа се потврди дека кревко било опоравувањето кое започна во 2013 година. Ова се наведува во најновата економска анализа на ЕК, во која увид имала агенцијата Бета, пренесе Б92

Единствено, се додава, до значителен раст во реалниот бруто домашен производ (БДП) , дошло во Македонија, како и на Косово, но за Косово тоа се должи на приватната потрошувачка поради големиот пораст на платите во државниот сектор и пенизиите во април оваа година. 

Во анализата се укажува на тоа дека „тешките поплави во мај во Србија и БиХ имале разорни последици по инфраструктурата и предизвикувле големите губитоци во производството особено во рударството и енергетиката. 

Во Црна Гора и Албанија забавувањето на растот се должи на големиот пад на индустриското производство, а во Србија состојбата се влошила и поради ниското ниво на инвестиции.

Така се наведува дека на Западен Балкан и понатаму е голема невработеноста, особено меѓу младите, што бара одлучни и уверливи структурни мерки на пазарот на работна сила и производство.  

Иако во последните месеци дошло до незначителен пад на невработеноста, во Србија преку 20% од работното способно население е без работа, во Македонија 28%, во Албанија 18%, а најмногу невработеност има на Косово 30% и во БиХ 27,5%. Сепак во Албанија дошло до пораст на вработеноста во првите седум-осум месеци годинава, исто како и во Македонија, благодарение на силното оправување на преработувачката индустрија. 

Во повеќето земји на Западен Балкан, се вели во економската анализа на ЕК, голем предизвик има малата покриеност на увоз со извоз а тековниот платен биланс се влошил особено до половината на годинава, достигнувајќи 11,6% од БДП во Албанија, 7% во БиХ, и 15,2%  во Црна Гора.

Во Србија како што е објаснето, најмногу поради поплавите, извозот паднал во јули и август, па дури станал и негативен, што го забави и го намали дефицитот на платниот биланс.

Тој дефицит е најнизок во Македонија, 1,2% благодарение на големите дознаки од странство.

Истовремено дошло до општ пад на цените во регионот, најмногу во секторот на храна, облека, комуникација и транспорт.

Банките во регионот незначително ги зголемија кредитите за претприемачите, со најголема стапка на ненаплатни банкарски позајмици во Албанија, дури 24% и во Србија дури 23%.

Балансирање на буџетскиот расход е забележан во Албанија и Црна Гора, во дел и поради подоброто собирање на данокот. Наспроти тоа во Србија и БиХ поради последиците од поплавите дошло и до влошување на економските прилики и пад на приливот во буџетот.

15.11.2014 - 13:17

Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа

најчитано сега