Невреме во Словенија: Поплавени патиштата, воз излета од шини, лавина камења затрупа автобус

Поради силно невреме во текот на ноќта во Љубљана, Крањ и Засавје, водата ги поплави зградите и патиштата, а на релација Зидани Мост-Љубљана воз излета од шините и налета во одрон, додека друга лавина од камења делумно затрупа автобус, јавуваат РТВ Словенија.

Карпеста лавина делумно затрупа и оштети автобус на градилиштето на патот Загорје на Сава-Литија, а двајца патници се полесно повредени. Словенечките железници соопштија дека во понеделникот во 21 часот и 35 минути патнички воз излетал од шините на пругата меѓу Сава и Мошеник, кој наиде на одрон непосредно пред Савската железничка станица.

Поради невремето во Засавје возот со 20 патници превентивно сообраќал со намалена брзина, а повредени нема, а линијата меѓу Загорје и Крешнице ќе биде затворена до следно соопштение.

Словенечките железници предупредуваат дека ќе има големи доцнења во патничките возови, а во прекин е и товарниот сообраќај.

Во текот на ноќта водата ги поплави зградите во Словенија, ветерот соборуваше дрвја и носеше покриви, а за санирање на последиците од невремето беа активирани 16 противпожарни единици.