На Денот на нулта дискриминација дебата за организацијата на средните училишта за превенцијата

Средношколци, училишни психолози и педагози и директори на училишта денеска во гимназијата „Јосип Броз Тито“ во Скопје дискутираа за организацијата на средните училишта во насока на превенција од дискриминација.

Панел дискусијата е организирана по повод Денот на нулта дискриминација - 1 Март, а ја отвори градоначалничката на Град Скопје Данела Арсовска.

-Се разговараше за видовите на дискриминација со кои се среќаваат учениците, како и за последиците од неа, а заклучоците од панел дискусијата беа во форма на мерки за заштита од дискриминација, со акцент на правните механизми за заштита, информира прес-службата на Град Скопје.

Оттаму истакнуваат дека Град Скопје со скопските средни училишта континуирано работи на подигнување на свеста за негативните ефекти од дискриминацијата, како и за реализација на мерки и активности за инклузивност во училиштата.

-Од суштинско значење се заедничките напори за спротивставување на дискриминацијата меѓу младите во сите нејзини форми, да се препознае вредноста на различноста и да се промовира инклузија и толеранција градејќи праведно и рамноправно општество, наведува во соопштение прес-службата на Град Скопје. 

 Целта на Денот на нулта дискриминација е да промовира различност, толеранција и инклузија.