Експлозија за време на матурски испит: Загинаа 29 ученици, 260 повредени

Во главниот град на Централноафриканската Република, Банги, за време на завршниот испит, се случи страшна експлозија на трансформатор, при што загинаа 29 ученици, меѓу кои 16 девојчиња, а дури 260 беа повредени.

Трагедијата се случи во средното училиште „Бартелеми Боганда“, додека околу 5.000 ученици низ градот полагаа завршни испити. Во моментот на експлозијата, работниците се обидуваа да го вратат напојувањето на оштетениот трансформатор, додека учениците беа во своите училници.

„Зградата се тресеше, сите се исплашија. Сите само сакаа да избегаат“, рече ученикот Алвин Јалигао, кој беше сведок на несреќата, објави „Билд“.

Во стампедото што следеше, некои ученици скокнаа од прозорците, додека други се задушија во толпата или беа прегазени. Коридорите и скалите што водеа до горните катови беа целосно блокирани, а многу ученици беа во несвест. Амбулантни возила и граѓани ги превезоа повредените до најблиските болници, вклучително и со мотоцикли. Министерството за здравство потврди дека 260 ученици се лекуваат во неколку градски болници.

Веста предизвика негодување кај жителите на Банги. Граѓаните се бесни на властите, кои ги обвинуваат за груба небрежност. Пред училиштето имаше немири, при што толпата фрлаше камења и предмети кон безбедносните сили кои пристигнаа на местото на настанот.

Претседателот на здружението на родители, Гедеон Сер Нгаисе, рече: „Оваа трагедија е резултат на небрежност и недостаток на редовно одржување. Бараме целосна и транспарентна истрага.“

Точната причина за експлозијата сè уште е непозната и е предмет на официјална истрага.