Барселона во вода до врат: Екстремниот дожд предизвика поплави

На аеродромот Ел Прат во Барселона во понеделникот поради обилните врнежи беа откажани 70 летови, а 18 авиони беа пренасочени кон други аеродроми, јави аеродромскиот оператор АЕНА.

Преку социјалната мрежа Х, тој ги покани патниците да го проверат статусот на нивните летови со авиокомпаниите.

Утрово дождот се пресели од провинцијата Валенсија, оставајќи 217 мртви, во соседна Каталонија. Вода течеше низ покривот на аеродромот, а патниците на терминалот шетаа низ водата со својот багаж, се вели во видеото на шпанската јавна телевизија TVE. Во текот на четири часа таму наврнале 150 литри дожд на метар квадратен, соопшти метеоролошката служба АЕМЕТ.

Во текот на денот, приградскиот железнички сообраќај беше прекинат во Каталонија, автономна покраина со 7,5 милиони жители. Откако водата ги блокираше патиштата, возачите беа повикани да не патуваат доколку не е потребно.

„Ситуацијата е грда“, вели една Хрватка во Барселона.

Службата за итни случаи примила 2.136 повици од жители на Каталонија до 13 часот, од кои 269 биле во главниот град Барселона.

Патиштата во Барселона се отворени од попладневните часови, но три патишта околу пристанишниот град Тарагона се уште се затворени. Некои болници во Каталонија ги откажаа прегледите и процедурите кои не се итни.

„Интензивните дождови продолжуваат во Барселона, Тарагона и Кастелон (во провинцијата Валенсија)“, соопшти метеоролошката служба, апелирајќи до жителите да бидат крајно внимателни.