По терористичките напади Израел размислува да им дозволи на цивилите да носат оружје

Кабинетот за безбедност на Израел одобри мерки со кои на Израелците ќе им се овозможи носењето оружје по двата одделни напади на Палестинците во Ерусалим оваа недела, јавува „Би-Би-Си“, додавајќи дека владата во полн состав ќе го разгледа в недела носењето на мерките.

„Кога цивилите имаат оружје, тие можат да се одбранат“, изјави контроверзниот екстремно десничарски министер за национална безбедност Итамар Бен-Гвир за новинарите пред болницата во Ерусалим. Новите мерки вклучуваат одземање на правото на престој и социјална заштита на членовите на семејството на напаѓачот.

Премиерот Бенјамин Нетанјаху вети силен и брз одговор на состанокот на безбедносниот кабинет.

„Не сакаме ескалација, но подготвени сме на секое сценарио“, рече тој.

Во петокот вечерта, 21-годишен Палестинец пукаше во случајни минувачи во близина на синагога во населбата Неве Јацов, убивајќи седум лица, а потоа се самоуби. Во саботата наутро, 13-годишен Палестинец застрела и рани двајца Израелци во Силван, во близина на ѕидините на Стариот град.

Ова ново насилство во источен Ерусалим доаѓа во време на ненадејна ескалација по смртта на девет Палестинци во четвртокот во операцијата на израелската армија во Џенин, на Западниот Брег, палестинска територија окупирана од Израел во 1967 година.