Орбан: Никој не се осмелува да признае, но ја загубивме војната во Украина

Западната стратегија насочена кон уништување на Русија не успеа, санкциите не ја постигнаа својата цел, а Русија ја спречи Украина да се приклучи на НАТО, изјави унгарскиот премиер Виктор Орбан.

„Никој не се осмелува да го признае тоа, но ја загубивме оваа војна“, рече тој, додавајќи дека руската економија не се распадна, пренесува МТИ.

На состанокот на претседателите на националните парламенти на земјите-членки на Европската Унија и претседателот на Европскиот парламент, Орбан предупреди дека и покрај ова, Европа сè уште ја продолжува војната и се однесува како победата да е можна.

Орбан верува дека светот е во состојба на трансформација споредлива со раѓањето на националните држави и Вестфалскиот мир. „Менталитетот на западниот свет се менува и Европејците мора да одговорат на овој процес“, нагласи Орбан, оценувајќи дека Европа е неподготвена.

„Како да сакавме да ги решиме проблемите од следната деценија со одговорите од претходната деценија, но старите вистини повеќе не функционираат. Светот се промени, а ние, Европејците, не успеавме да го следиме примерот“, заклучи тој.

Поканети учесници на дијалог за две стратешки прашања

Во Будимпешта денес започна Конференцијата на претседатели на парламентите на земјите-членки на Европската Унија насловена како „Европска иднина“. Конференцијата ја отворија унгарскиот премиер Виктор Орбан и претседателот на унгарскиот парламент Ласло Ковер, кои зборуваа за предизвиците со кои се соочува Европа.

Потсетувајќи дека оваа конференција е највисок форум за соработка меѓу националните парламенти и дека нејзина задача е да постави стратешки цели за соработка, Орбан рече дека унгарскиот парламент отсекогаш бил место на соработка и сцена на политички битки, како и на стратешки дискусии.

Тој ги покани учесниците на дијалог за две стратешки прашања кои, како што рече, ќе ја одлучат судбината на Европа и нејзините земји-членки во наредните децении и ќе ја одредат улогата на националните парламенти, наведувајќи дека првото прашање е заштитата на националниот суверенитет, а второто прашање е приемот на Украина во ЕУ.

Според Орбан, денес во светот се случува трансформација.

,Нови ветрови дуваат во Соединетите Американски Држави. Програмата на прогресивен либерализам не успеа и беше заменета со патриотска политика. Оваа промена не е само внатрешен американски политички развој, туку има и сериозни меѓународни последици“, истакна Орбан, додавајќи дека ова претставува почеток на нова ера.

Тој предупреди дека Кина напредува со брзо темпо

Тој истакна дека Кина напредува со брзо темпо и сега се натпреварува не само во индустрискиот капацитет, туку и во нивото на својата технологија.

Конференцијата на претседатели на парламентите на Европската Унија е највисок форум за соработка меѓу европските национални парламенти, со примарна функција на дефинирање на рамката и стратешките цели на меѓупарламентарната соработка.

Првата Конференција на претседатели на парламенти се одржа во Рим во 1963 година, додека состаноците станаа редовни по 1975 година, со цел да се промовира важноста на улогата на парламентите. Конференцијата се организира секоја година, во првата половина од годината, а учесници се претседателите на 27-те европски парламенти и претседателот на Европскиот парламент.