Нова странска компанија сака да гради фабрика во штипската ТИР зона

Новa странска компанија ќе влезе во ТИР зоната во Штип, најави денеска од Штип, директорот на Дирекцијата за ТИР зони, Јован Деспотовски. Тој истакна дека писмото за немера за инвестирање од компанијата пристигнало вчера во дирекцијата.

-Да ги завршиме разговорите со нив, очекувам дека до крајот на годината ќе можеме да ги објавиме. Тоа значи дека ќе имаме нова инвестиција тука, а дополнително една од компаниите, којашто веќе работи во ТИР зоната во Штип, којшто е добар инвеститор, веќе достави нов инвестициски план, за целосна нова инвестиција, вели Деспотовски.

Смета дека со компанијата, којашто веќе работи во зоната и бара проширување на капацитетот разговорите ќе траат пократко, бидејќи веќе имаат многу добра соработка со компанијата. Новите инвестиции во штипската ТИР зона ќе значат нови работни места, со доста повисоки плати. Деспотовски истакна дека изминатиот период не бил во фокусот рамномерниот регионален развој, но со воведувањето на мерката за вреднување на земјиштето во ТИР зоните ова е коригирано.