Ковачевски, Османи, Маричиќ и Агелер на вечера со Габриел Ескобар

Премиерот Димитар Ковачевски, шефот на дипломатијата Бујар Османи и вицепремиерот Бојан Маричиќ вечерва беа на работна вечера со амбасадорката на САД, Анџела Агелер и заменик-помошникот државен секретар на САД и специјален претставник за Западен Балкан, Габриел Ескобар.

Засега нема детали од работната вечера во Клубот на пратеници. Османи објави три фотографии и кратко напиша: „Работна вечера со Габриел Ескобар“.

За утре е закажана заедничка прес-конференција на Ковачевски и Ескобар во 10:45 во Влада. Според најавите, американскиот дипломат треба да се сретне и со претседателот на ВМРО-ДПМНЕ.

Претходно Стејт Департментот за Гласот на Америка на македонски јазик изјави дека Ескобар се надева на продуктивни и заеднички дискусии со владините лидери.

„Ескобар патува во Северна Македонија за да разговара за билатерални и регионални прашања и да продолжи да го зајакнува нашето партнерство со ценет НАТО сојузник. Тој се надева на продуктивни и заеднички дискусии со владините лидери за време на неговата посета, особено поврзани со идната интеграција во ЕУ и долгорочниот просперитет на Западен Балкан“, се вели во изјавата на портпарол на Стејт департментот за Гласот на Америка на македонски.