Приведен поранешниот градоначалник на Центар

На скопскиот аеродром синоќа e приведен Владимир Тодоровиќ, поранешен градоначалник на скопската општина Центар. Приведен е бидeјќи е поврзан со предметот на поранешното СЈО „Око“.

На граничниот премин Табановце утрово e приведен и поранешниот претседател на Советот на Општина Центар Владимир Здравев, пренесуваат македонските медиуми.

Од МВР за „Прес24“ за случајот информираат дека се приведени вкупно пет лица во врска со чл.273 ст.5 и чл.353 ст.5 од Кривичниот законик.

„Вчера (29.06.2023) во попладневните часови и во текот на вечерта од страна на полициски службеници од МВР - Оддел за сузбивање на организиран и сериозен криминал, по налог на ОЈО ГОКК, а со наредба на судија на претходна постапка, лишени се од слобода пет лица во врска со чл.273 ст.5 и чл.353 ст.5 од Кривичниот законик“, изјавија од МВР за Прес24. Членот 273 се однесува на дело „перење пари“, а членот 353 на злоупотреба на службена положба и овластување.

Лицата се приведени и задржани во полициска станица и во текот на денот ќе бидат изведени пред судија на претходна постапка. 

Повеќе детали се очекуваат наскоро. 

Инаку, пред 5 години Финансиската полиција поднесе кривична пријава против три лица, меѓу кои и екс-градоначалникот на Општина Центар, за криминал за изградбата на пешачкиот мост „Око“, кој е дел од проектот „Скопје 2014“.

Од МВР информираат дека вчера се уапсени петмина, за истиот случај.