Утрово мирна е ситуацијата на северот на Косово
На северот на Косово утрово е мирно, по вчерашните немири.
До немири дојде кога граѓаните се обиделе да го спречат упадот на косовската полиција во општинските згради во Зубин Поток, Лепосавиќ и Звечан, пишува „Б92“.
Од синоќа во седиштето на сите четири општини со мнозинско српско население на северот на Косово се наоѓаат припадниците на полицијата и специјалните единици.
Полицијата е распоредена и околу општинските згради, како и возила за разбивање на демонстрации.
Патиштата на север од покраината се проодни, како и административните премини кон централна Србија, па сообраќајот се одвива нормално.
Во петокот, откако граѓаните на северно Косово и Метохија се обидоа да ја спречат полицијата да влезе во општинските простории во Звечан, Зубин Поток и Лепосавиќ, дојде до конфликт, во кој полицијата употреби солзавец, чад и шок бомби.
Во таа прилика беа повредени неколку Срби, а косовската полиција влезе во општинските згради и во нив ги внесе градоначалниците Албанци, пишува „Б92“.
Насилниот влез на полицајци во општинските згради го осудија земјите од Квинтата, Европската Унија, КФОР и ЕУЛЕКС, барајќи итен прекин на насилните акции на Приштина. Особено остри осуди доаѓаат од Соединетите Американски Држави
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа