Османи: Борбата со корупцијата ќе ни биде приоритет во соработката со САД

Борбата со корупцијата ќе биде во фокусот на САД во периодот кој следи. Ваков бил заклучокот на средбата која Министерот за надворешни работи Бујар Османи утрово ја имал со американската амбасадорка Ангела Агелер.

Во фокусот на разговорите беа проектите, активностите и целите на Стратешкиот дијалог меѓу САД и Северна Македонија, кој се одржан во јуни оваа година во Вашингтон. Османи информираше за Акцискиот план, подготвен од страна на Министерството за надворешни работи, преку кој Владата ќе ја следи имплементацијата на проектите и резултатите од Стратешки дијалог меѓу двете земји, велат од МВР 

„Соодветно на веќе утврдените приоритети, првата област на интензивирана соработка во рамките на Акцискиот план е владеењето на правото и борбата против корупцијата, со што ќе се зајакне соработката меѓу двете земји и поддршката од страна на САД во оваа област.“ изјави Османи, посочувајќи дека очекува наскоро Владата да го усвои Акцискиот план и да се започне со негова имплементација.

На средбата стана збор и за останатите приоритети во рамките на Стратешкиот дијалог како што е претседавањето со ОБСЕ во 2023 година, претстојното преземање на претседавањето на Република Северна Македонија со САД – Јадранската Повелба, сојузништвото во НАТО, справувањето со геополитичките предизвици во регионот, како и континуираната американска поддршка за нашиот евроинтегративен процес.