Вукоичиќ не е повеќе тренер на МЗТ

МЗТ Скопје ја прекина соработката со тренерот Влада Вукоичиќ, откако од таборот на аеродромскиот кошаркарски тим решија да направат неколку промени се со цел да ја вратат екипата на победничките патеки и исполнувањата на големиот број на фанови. 

- Влада Вукоичиќ повеќе не е тренер на МЗТ Скопје Аеродром. Ова е само една од неколкуте промени што ќе се случат во клубот во овој период, стои во кусата информација на Фејсбук профилот на МЗТ.

Вукоичиќ како тренер во МЗТ Скопје пристигна на почетокот од сезоната, и во досегашниот период од два месеци успеа да забележи 17 официјални натпревари, (10 во АБА лигата и 7 во Еврокупот). Во нив забележа пет победи (4 во АБА + 1 во Еврокупот). Сепак сето ова не беше доволно за амбициите и очекувањата на раководството на МЗТ Скопје.

Како директен повод за отказот на српскиот стратег е саботниот пораз од Цибона и покрај водството на МЗТ Скопје од 26 поени разлика.

Се очекува денеска МЗТ да излезе со официјално соопштение за наследникот на Вукоичиќ, а според некои шпекулации прва опција е словенечкиот тренер Зоран Мартич.