Заев сепак останува во претседателската трка - Црвенковски уште еднаш рекол дека се повлекува

Струмичкиот градоначалник, Зоран Заев сепак останува во трката за нов претседател на СДСМ. Како што дознава Press24 од свои извори на Бихаќка, вчерашниот настап на Заев пред Извршниот одбор на СДСМ бил лошо протолкуван, а ситуацијата дополнително ја докомплицирал самиот Заев кој не бил доволно јасен во својата изјава за медиумите. 
Според нашите информации, Заев пред Извршниот на СДСМ рекол дека не сака поделби внатре во партијата и дека е подготвен, доколку се договорат за еден кандидат, тој да се откаже од својата кандидатура. 
Расправијата во СДСМ избила откако дел членовите реагирале на однапред започнатата кампања на дел од кандидатите за претседатели. Откако неколку говорници излегле со став дека без Црвенковски партијата ќе пропадне, актуелниот лидер, според нашите извори уште еднаш пред Извршниот одбор рекол дека нема да прифати кандидатура за нов мандат и дека нема да поддржи ниту еден кандидат. Сепак, Црвенковски не бил подготвен ова да го соопшти јавно и да побара од општинските одбори да не го кандидираат за нов мандат. Иако тоа од него го побарале дел од членовите на Извршниот одбор, Црвенковски рекол дека во интерес на декмократијата треба да се остави, секој да може да биде кандидиран и дека токму затоа не сака да ги спречи општинските одбори да собираат потписи за негово останувње.
Се очекува до крајот на денот Заев да излезе со став дека останува во трката за претседател на СДСМ.