ВМРО-ДПМНЕ: Со СДСМ има национална катастрофа, секој кој го прекршил законот мора да одговара
СДСМ владее со политички терор и притисоци. Државата е киднапирана од картелот на власт, а граѓаните се повеќе осиромашуваат, им се зголемуваат даноците и се менува името и идентитетот на државата, соопштуваат од ВМРО-ДПМНЕ.
Од партијата посочуваат дека недемократската и немакедонска власт предводена од Зоран Заев го користи политичкиот прогон против Никола Груевски за политичка хајка против ВМРО-ДПМНЕ.
-Ударот врз опозицијата има една цел – да се дефокусираат граѓаните од мачната живеачка и се полошите политики кои ја водат државата во пропаст. Правната држава не функционира. Откако СДСМ е на власт до сега има евидентирано вкупно 9 нерасчистени убиства, бројот на грабежи е зголемен, а сведоци сме на секојдневни престрелки во центарот на Скопје и запалени автомобили на фреквентни локации, но никој не одговара. Сторителите како и секогаш не и се познати на полицијата водена од Спасовски. Година ипол правосудните органи немаат поведено ниту една постапка за корупција и криминал против претставници на власта, се наведува со партиското соопштение.
Од ВМРО-ДПМНЕ додаваат дека владеењето на правото е нарушено целосно, а демократијата е стран поим во Република Македонија под водство на СДСМ.
-Додека се случува национална катастрофа во режија на СДСМ, граѓаните се тие кои го плаќаат цехот. Токму затоа СДСМ мора час поскоро да си замине од власт, а одговорност мора да има за секој кој го прекршил законот, нагласуваат од партијата.
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа