Џафери: Се надевам дека опозицијата нема да го кочи изборот на ДИК

 Претседателот на Собранието на Република Македонија Талат Џафери се надева дека опозицијата нема да го кочи изборот на членовите на Државната изборна комисија од која зависи и одржувањето на референдумот.

- Прв пат се случува Комисијата за избори и именувања да ја води опозицијата. По завршувањето на изборите во 2016, компромисно се договоривме и пруживме рака како мнозинство, да покажеме дека имаме верба во опозицијата. Со сето ветување од опозицијата дека нема да се искористи за опструкција таа Комисија, гледаме дека во пракса не е така, рече Џафери во емисијата „Уреднички брифинг“ на 1ТВ.

Вели дека на проблемот со изборот на ДИК посочил уште кога нејзините членови поднеле колективна оставка.

- По барањето на политичките партии за колективната оставка на членовите на ДИК, моја сугестија беше да се води сметка дека се воспоставува лоша пракса на колективно откажување од функциите под плаштот на справување со една или со друга појава, затоа што ќе дојдеме во ситуација да немаме функционална институција, а сите сме луѓе и не сме договорени кога и што може во иднина да се случи, истакна Џафери.

Тој посочува дека сите процедури за референдумот зависат од изборот и работата на ДИК. Точно е, потенцира тој, дека Собранието е надлежно да донесе одлука за распишување на референдум, меѓутоа ДИК е таа што треба да го спроведе.

– Политичките партии на итна седница консензуално, со двотретинско мнозинство, со потпис на координаторите на политичките партии ги изменија деловите на Изборниот законик во делот на избор на ДИК со кое се враќа претходното решение, она пред Пржино, членовите на Комисијата да бидат предложени од политичките партии со ограничен мандат до есента и на есен да се влезе во измени на Кривичниот закон со кое што би се декриминализирало финансирањето на политичките партии во делот на она што е кривична одговорност при изборите за оние сметки кои што се отвораат за потребите на изборите, вели Џафери.

Додава дека политичките партии со измени на закон го обврзаа Собранието, во соодветна постапка да објави оглас за пријавување на членови на ДИК, за кои по соодветна процедура политичките партии ќе дадат согласност за членови онака како што е пропишано во законот.

- За да може да се постапи од пријавените преку 40 кандидати, Комисијата за избори и именувања на седница треба да утврди предлог листа на кандидати кои ги исполнуваат условите. Таа предлог листа треба да дојде кај мене во Собранието и врз база на таа листа јас да ги известам политичките партии дека ова е листа на кандидати кои што ги исполнуваат условите од кои што треба повратно во рок од три дена да ми се достават одговори за кои кандидати партиите застануваат, вели тој.

Џафери потенцира дека откако ќе добие таа информација од политичките партии зад кои кандидати стојат, тој тие материјали ги доставува до Комисијата за избори и именувања за таа на седница изнесе предлог листа за членови на ДИК – кој ќе биде претседател, потпретседател, член. Таа предлог листа, вели тој, потоа треба да ја стави на посебна седница на Собрание.