Ќерката врескала во возилото, пронајден и мажот - драмата во Калиманци со трагичен крај
Во 12 часот и 10 минути завчера, во Полицијата во Македонска Каменица, Л.Р. телефонски пријавила дека нејзината ќерка, 31-годишната Т.С. и зетот, 10 години постариот Д.С. имале брачни недоразбирања и двајцата со возило „Форд Фиеста“ со штипски регистарски ознаки се упатиле кон Делчево. Мајката слушнала врисок од ќерка си и поради тоа се сомневала дека нешто лошо се случило.
Полицијата во 17 часот и 45 минути во водите на браната Калиманци кај местото викано „Рибница“ забележала тело како плута на површината на водата. За жал подоцна е утврдено дека телото е на несреќната девојка.
На брегот, во близина на пронајденото тело, пронајдени се и траги од возило кои водат до езерото. Во Здравствен дом – Македонска Каменица бил извршен преглед на телото на Т.С. при што се констатирани повреди на главата и десната надлактица и долниот дел на грбот. Над телото на Т.С. е извршена и обдукција при што е констатирано дека смртта настапила како последица од давење во вода.
Полицијата околу 18 часот вчера го пронајде и телото на Дејан С. Телото на починатиот Дејан е најдено во возилото, а врз телото немало знаци на насилство, а смртта настапила од давење во водата.
Екипите од МВР од 11 часот претпладне трагаа по телото на сопругот и возилото на сопружниците на местото каде вчера попладне беше пронајдено телото на 31-годишната жена.
Поради длабочината на овој дел од езерото која е над 10 метри, потрагата во матната вода одела тешко.
Овој настан ја потресе македонската јавност.
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа