Груевски на средба со еврокомесарот Хан
Во резиденцијата на Европската унија во Скопје во тек е средба на еврокомесарот за проширување Јоханес Хан со премиерот и лидер на ВМРО-ДПМНЕ Никола Груевски.
Тој на средбата е придружуван од министерот за надворешни работи Никола Попоски, за здравство Никола Тодоров, вицепремиерот и министер за финансии Зоран Ставрески, со координаторот на пратеничката група на ВМРО-ДПМНЕ Илија Димовски и шефот на Кабинет Мартин Протугер.
Претходно еврокомесарот Хан имаше средба со лидерот на СДСМ Зоран Заев, кој по средбата заедно со потпретседателката на партијата Радмила Шекеринска и Оливер Спасовски, министер за внатрешни работи во актуелната Влада, замина од резиденцијата на ЕУ.
По средбата со Груевски, еврокомесарот Хан треба да има средби и со лидерите на ДУи и ДПА, Али Ахмети и Мендух Тачи.
Пред почетокот на средбите Хан со четворицата лидери на политичките партии потписници на договорот од јуни/јули 2015 година иизјави дека очекува оти денеска ќе биде добар ден.
Од Европската комисија во Скопје најавија дека по поединечните средби еврокомесарот во текот на денот ќе има и и заедничка средба со партиските лидери на која се очекува да присуствуваат и евроамбасадорот Аиво Орав и амбасадорот на САД Џес Бејли.
Се очекува денеска да биде постигнат финален договор во врска со неколку отворени прашања поврзани со договорот од Пржино како што се медиумите и прочистувањето на Избирачкиот список, но исто така се очекува до крајот на денот да биде познато дали предвремените парламентарни избори ќе се одржат во рокот што беше договорен - 24 април 2016 година или, пак, тие ќе бидат пролонгирани како што бара опозицијата.
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа