Во 2015. Грција ќе треба да враќа 22,5 милијарди евра долг кон ЕУ и ММФ

Грција следната година ќе треба да го отплати долгот во износ од 22,5 милијарди евра кон Европската унија и Меѓународниот монетарен фонд, пишува грчкиот весник „Етнос“. 

Весникот коментира дека без разлика кој ќе биде на власт во Грција во 2015 година, тој ќе биде соочен со голем финансиски тест. 

- Следното лето за Грција ќе биде вистински кошмар, со оглед на тоа што во период од три месеци, јуни, јули и август, која влада и да дојде на власт, ќе треба да го враќа долгот кон кредиторите. А само за тие три месеци вредноста на задолжувањата е 11,5 милијарди евра. Од каде ќе ги најде тие пари?, прашува весникот.

„Етнос“ објави дека доколку во Грција бидат одржани предвремени парламентарни избори во февруари и Алексис Ципрас стане премиер, уште со самото доаѓање на власт неговата влада ќе треба да плати 2,1 милијарда евра на ММФ и 1.9 милијарди за камати, односно вкупно четири милијарди евра.

- Следуват уште плаќања, при што вкупната сума на задолжувања, ќе достигне 22,5 милијарди евра, додава „Етос“.