Во МНР одбележани 100 години од почетокот на Првата светска војна

Во Министерството за надворешни работи во присуство на дипломатскиот кор и други гости денеска беше одбележана стогодишнината од почетокот на Првата светска војна со пригодни обраќања на министерот за надворешни работи Никола Попоски и амбасадорката на Франција во Република Македонија, Лоранс Оер.

Како што соопшти МНР, министерот Поповски во обраќањето истакнал дека Република Македонија отсекогаш се залагала за слобода, мир, солидарност и оти како субјект во меѓународната заедница, секогаш е подготвена да даде придонес во борбата против предизвиците и глобалните ризици.

- Би сакал уште еднаш да се поклонам пред борците и македонските цивили кои заедно со другите европски народи ги жртвуваа своите животи за слобода и мир давајќи придонес во создавањето на денешната обединета Европа, потенцирал Попоски.

Овој настан организиран заедно со француската Амбасада претставува почеток на циклусот настани кои многу европски држави, вклучувајќи ја и Република Македонија во следните четири години ќе ги посветат на стогодишнината од Првата светска војна.