Нема унгарски пари ни за проектите на струмичкиот градоначалник

Општина Струмица, чиј градоначалник е од редовите на СДСМ, е една од четирите општини кои нема да добијат дел од унгарскиот колач, поради кој Владата се задолжи кај Орбан.  Покрај Струмица, пари за проекти нема да добијат Град Скопје, Теарце и Сарај, под образложение дека не ја поминале фазата на евалуација.

Инаку, по извршената евалуација од страна на ресорните министерства, Владата соопшти дека одлучила оваа година да бидат финансирани вкупно 274 проекти во 77 општини, со вкупна вредност од нешто над четири милијарди денари или околу 65 милиони евра.

„Владата изрази благодарност на општините за максималната посветеност и ангажираност, што само ја докажува нивната способност и волја за инфраструктурен напредок, за што, во изминативе години немале можност поради ограничените финансиски средства. Почнувајќи од оваа година и во наредните години, на општините им се отвара нова можност да ги реализираат приоритетните проекти, да ги подобрат основните услови за живеење за граѓаните, да можат општините да се развиваат побрзо и да се создаваат нови можности за граѓаните“, пишува во владиното соопштение.