Мајка чија ќерка изгуби две нејзини другарки во „Рибникар“ јавно проговори: „За неа тоа веќе не е училиште и не сака да оди во него“

Министерството за образование на Србија пред неколку дена донесе четири мерки за продолжување на работата и враќање на децата во училиштето „Владислав Рибникар“, по трагедијата што се случи на 3 мај, во која К.К. уби девет другари и член на обезбедувањето, додека наставничката по историја ја ранил како и уште тројца ученици.

Мајката на девојчето кое на 3 мај ги загуби двете најдобри другарки, Марија Илиќ Паовиќ, вели дека нејзиното дете повеќе не го прифаќа „Рибникар“ како безбеден простор и не сака да се врати на училиште.

– За неа тоа веќе не е училиште и не сака да оди. Таа веќе не го доживува тој простор како нејзино безбедно место а им беше како втор дом. Тие се чувствуваа безбедно, а сега тоа е првото нешто што треба да се урне. Сите бараме одговори на прашањето зошто? Требаше повеќе да се фокусираме на жртвите и на сите засегнати од оваа ситуација – вели Марија и додава дека за повеќето родители од „Рибникар“ се уште е 4 мај.

„Мислам дека сите се уште сме во сериозна траума. Кога некој ќе ви испрати мејл два дена по трагедијата дека вашето дете треба да тргне на училиште од среда, чувствувате неверојатен страв, дека треба да донесете одлука во име на вашето дете за ситуација која ниту вие не можете да ја прифатите, а камоли да се одлучи дали таа одлука е добра или не“, додаде таа.