(ФОТО+ВИДЕО) Жестока ноќна битка на пожарникарите со огнот кај Бељаковце и Руѓенце
„Иако генерално се избегнува ноќно гаснење на пожарите на отворено, овојпат, со храбрите македонски пожарникари одлучивме во текот на ноќта да го нападнеме силниот оган кој проголта две стари, но функционални куќи од с. Бељаковце, вклучително и две помошни простории во ова село. Но и една стара напуштена куќа во с. Руѓенце“, соопшти директорот на Центарот за управување со кризи, Стојанче Ангелов на социјалната мрежа „Фејсбук“.
Пожарот кој избувнал во попладневните часови вчера, (понеделник, 28.08.2023) дополнително се разгорел и проширил во доцните попладневни часови, кога веќе било доцна за полетување на дежурните два полициски и еден армиски хеликоптер, како и еден Ер трактор на ДЗС.
„Бидејќи пожарот се движеше во два правци со линија подолга од еден километар, но најверојатно значително повеќе, а и двата крака дополнително загрозуваа други куќи од овие две села, бидејќи ветрот кој дуваше го движеше огнот многу бргу голтајќи ја пред себе високата сува трева, трња, дрвја, меѓу нив и лесно горливите ниски смреки и други зимзелени дрвја, чекањето на раните утрински часови кога можеа да полетаат двата полициски и еден армиски хеликоптер, ќе предизвикаше дополнителен ризик за куќите и населението во овие две села“, објасни Ангелов.
На местото на пожарот веќе се наоѓале пожарникарите од ТППЕ Старо Нагоричане, Ранковце и Крива Паланка. Но, бидејќи состојбата била алармантна, Ангелов побарал засилување со пожарникари од ТППЕ Кавадарци, Штип, Свети Николе и Куманово, вклучително и пожарникари од доброволното противпожарно друштво од Свети Николе.
„Подршката ја барав возејќи кон пожарот. Беше темно кога пристигнав во с. Бељаковце и веднаш извршив извидување на теренот и состојбата со пожарот. Отидов до две опжарени помошни простории. од таа позиција имав добар видик на едниот крак од пожарот. Пред полноќ пристигна и комплетното засилување со пожарникари од посочените ТППЕ.
Околу 00.30 одлучивме да се приближиме на пламените јазици кои на некои места се издигнуваа по неколку метри над земјата голтајќи ги пред себе дрвјата, грмушките и високата сува трева. Опремени со т.н. напртњачи (мешини со рачни прскалки со 20 литри вода кои се носат на грб) како и специјални противпожарни метли со метални ленти, исклучително храбрите и пожртвувани пожарникари, со теренски возила ги пренесовме пред самата линија на огнот. На местото на кое го прсретнавме пожарот, огнот гореше многу силно, температурата беше висока и имаше многу чад. Ситуацијата се менуваше од миг во миг. Мојата цел беше сејфти фрст, не смееше да се загрози човечки живот повеќе од она што беше неопходно, бидејки сите бевме изложени на одреден ризик. Претходно стекнатата голема доверба во нашите пожртвувани пожарникари ме охрабри да бидам рамо до рамо со нив и да им помагам возејќи ги лично со теренското возило на ЦУК. Но сепак на некои моменти се изложивме на голем ризик“, раскажува првиот човек на ЦУК.
Тој извести дека по двочасовна неизвесна борба со огнот успеавле целосно да го изгаснат овој голем пожар.
„На двата крака остана по една дежурна екипа пожарникари од ТППЕ Кавадарци и Штип чија задача беше да внимаваат пожарот повторно да не се разбуди. Во овој момент, вторник наутро, пожарот не покажува никакви знаци на горење. Изгорената површина најверојатно е значително поголема од 100 ха, дополнително ќе излеземе со поконкретна проценка“, заклучи Ангелов.
29.08.2023 - 11:05
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа
