Жена се изгубила во австралиска дивина, преживеала со шише вино

48-годишна жена од Австралија се изгубила во австралиската дивина и преживеала пет дена во непристапниот терен јадејќи слатки и пиејќи вино. Лилијан Ип во неделата отишла на кратко патување, а завршила во непристапен предел на сојузната држава Викторија. Откога погрешно свртела, наишла на ќор-сокак, а возилото ѝ се заглавило во калта.

Поминала пет ноќи заглавена во дивината, а во петокот била пронајдена од службите за итни случаи. Лилијан, која тврди дека вообичаено не пие, имала шише вино во автомобилот, што планирала да го подари.

„Првото нешто што ми падна на ум беше вода и цигари“, изјави таа за 9News Australia. „Мислев дека ќе умрам таму. Целото тело ми откажа во петокот“, рече таа.

Бидејќи изгубила надеж дека ќе биде пронајдена жива, напишала писмо до семејството во кое вели дека ги сака. Лилијан била пронајдена на 60-ина километри од најблискиот град, а бидејќи не можела да оди далеку поради здравствени проблеми, останала покрај својот автомобил, соопшти полицијата на Викторија.

Со себе имала само неколку грицки и слатки, заедно со шише вино, а била и без вода.

„Единствената течност што Лилијан ја имала со себе било шише вино што го купила како подарок за мајка си, но тоа ја спасило“, рече наредникот Мартин Торпеј од полициската станица Водонга. „Таа го следеше здравиот разум и тоа ѝ помогна да не залута во дивината, а тоа ѝ помогна и на полицијата да ја најде“.

На крајот, полицијата ја однела во болница, каде што била лекувана од дехидратација, но не се задржала долго и во меѓувреме се вратила дома во Мелбурн.