Во Германија нагло се зголеми бројот на млади Руси кои бараат азил

Германија бележи нагло зголемување на бројот на руски баратели на азил од почетокот на годината, објавија германските медиуми.

„Во првите три месеци од оваа година, 2.381 руски државјанин поднеле барање за политички азил во Германија, што е повеќе отколку во цела мината година“, пренесува информативниот интернет портал „Табл медиа“, повикувајќи се на податоци на Федералната канцеларија за миграција.

Конкретно, забележлив е голем пораст на бројот на апликанти на возраст од 19 до 30 години, што укажува дека многу апликанти сакаат да избегнат мобилизација во руската армија.

Според тоа, процентот на машки апликанти, односно потенцијални регрути, се зголеми од 59 на 64 проценти.

Оние кои ќе одбијат да се приклучат на руската армија можат да поднесат барање за азил во Германија и да очекуваат заштита.

„Оние кои не сакаат да учествуваат во војната на Путин против Украина, по правило, имаат право на меѓународна заштита“, рече портпаролката на БАМФ. Не се споменува колку такви случаи има меѓу барателите на азил.

По почетокот на рускиот напад врз Украина во февруари минатата година, во Германија пристигнаа над милион бегалци од Украина, кои автоматски се стекнуваат со статус на воени бегалци, што ги вклучува истите социјални привилегии како и за германските граѓани.

Во Германија моментално се води жестока дебата меѓу федералните и сојузните државни органи за преземање на трошоците за сместување на бегалците и барателите на азил, чиј број исто така расте.

Поради зголемениот број на илегални миграции преку т.н Балканските рути, но и од Италија, Германија ги продолжи контролите на границата со Австрија за половина година.

Германскиот канцелар Олаф Шолц свика кризен состанок на тема прифаќање бегалци за почетокот на мај.