Уште еден Србин уапсен во Косово, обвинет за воени злосторства

Косовската полиција го уапсила Драгиша Миленковиќ од околината на Грачаница под обвинение за воени злосторства, потврдија за РТС од семејството на уапсениот.

Велат дека при апсењето полицајците биле насилни, а припадниците на специјалните единици упаднале во неговиот двор околу пладне.

„Го блокираа целиот простор и не дозволуваа никој да се приближи, а потоа го извадија Миленковиќ“, јавува дописникот на РТС.

На семејството му било објаснето дека Миленковиќ е уапсен за воени злосторства врз Албанци кои наводно ги малтретирал додека работел како чувар во затворот во Липлан.
Пред куќата на семејството Миленковиќ по апсењето се собраа вознемирени соседи и мештани.

Сопругата на Драгиша Миленковиќ поради шокот кој го доживеала е пренесена во болница.

Уапсениот Миленковиќ е татко на три деца, информираат српските медиуми.