Студенти од Правниот факултет „Јустинијан I" на гости во Уставниот суд

Студенти од Правниот факултет „Јустинијан I" го посетија Уставниот суд и се запознаа со работата и надлежностите на судиите. Посетата беше организирана на барање на ЕЛСА (Европското здружение на студенти по право) и се реализираше во рамки на активностите за разбирање и учење на правото во пракса. 

Студентите присуствуваа на 40. седница на Уставниот суд која се одржа на 14 декември 2022 година и имаа можност да ги слушнат аргументите на судиите за предметите коишто беа ставени на дневен ред.  По седницата направија обиколка во Судот и се запознаа со условите за работа на вработените и имаа можност да разговараат со претседателката Добрила Кацарска која ги упати во улогата и значењето на Судот, како и уставно-судската пракса низ случаи кои биле во фокусот на јавноста. 

„Секогаш имајте предвид дека добри правници се чесните, професионални и луѓе со интегритет кои не должат никому ништо и одлучуваат исклучиво во интерес на граѓаните, без оглед дали станува збор за уставни судии, кривичари или судии од граѓанската област. Вложувајте во вашата лична надградба и напредок со читање и заинтересираност,  учете од поискусните”, им порача претседателката на Уставниот суд, Добрила Кацарска. 

Студентите беа заинтересирани како се носат одлуките во Уставниот суд, родовиот баланс во правосудството и Уставниот суд,  се интересираа дали жените судијки имаат еднакви права и третман како мажите судии, како се справуваат судиите со надворешните влијанија и притисоци итн. 

Како претставници од Уставниот суд, на средбата покрај претседателката на Уставниот суд, Добрила Кацарска присуствуваа секретарот на Судот, Александар Лазов и портпаролката Христина Беловска која ги информираше како се  практикува транспарентноста на Уставниот суд и на кој начин Судот ги информира новинарите и граѓаните.