Претседателот на Собранието Талат Џафери во официјална посета на Словенија

Претседателот на Собранието Талат Џафери престојува во дводневна официјална посета на Словенија на покана на претседателката на Државниот збор, Уршка Клакочар Жупанчич.

Во состав на делегацијата се и пратениците Александар Велјановски, претседател на пратеничката група за соработка со Парламентот на Република Словенија и членовите Бети Рабаџиевска – Наумовска и Берат Ајдари.

Во рамки на посетата, како што информира собраниската прес-служба, предвидени се средби со координаторите на пратеничките групи во Државниот збор, членовите на Комисијата за ЕУ прашања и Комисијата за надворешна политика, како и со претседателката Сандра Газинковски и членовите на Групата за пријателство во словенечкиот Парламент.

Претседателот на Собранието Талат Џафери ќе оствари средби и со претседателката на Словенија, Наташа Пирц Мусар, претседателот на Владата, Роберт Голоб и потпретседателката на Владата и министер за надворешни работи Тања Фајон.