Откриен е идентитетот на Србинот масакриран во Виена, со отсечени делови од телото

Поминаа два месеца од веста за монструозното убиство на Србин во стан на границата на областа Отакрин-Херналс кога виенската полиција кон крајот на февруари годинава го пронашла неговото осакатено тело во станот заедно со дрога. Идентитетот на овој човек сега е и официјално утврден, а како што пренесуваат виенските медиуми, станува збор за дваесет и седумгодишен човек од Србија.

Се огласи и портпаролката на локалната полиција ,Барбара Гас, која истакна дека е очигледно дека се работи за мафијашко убиство.

„Станува збор за дваесет и седумгодишен маж со српско потекло, а со оглед на околностите во кои е пронајден трупот, најверојатно се работи за организиран криминал“, посочи портпаролката на полицијата.

Идентификацијата на Србинот беше многу потешка поради состојбата во која беше пронајден. Трупот на мажот бил во напредна фаза на распаѓање, а делови од телото, вклучително и прсти, биле отсечени. Инаку, во станот во кој бил искасапен Србинот пронајдена е комплетна опрема за касапење и чистење, како и документите на тројца Срби. Уште тогаш виенските истражители се сомневаа дека зад ова свирепо злосторство стои балканската мафија токму поради стилот на самата егзекуција.

Полицијата во разговорот со соседите не успеала да добие повеќе информации со оглед дека во зградата никој не ја видел жртвата, а според истражителите, лешот бил пронајден во напредна фаза на распаѓање, па се претпоставува дека бил таму дури и неколку месеци пред откритието.

„Можно е лешот да бил таму во станот со недели, можеби и месеци. Во секој случај, јас никогаш не го видов убиениот, но забележав дека на неговата врата секогаш висеше порака“, вели соседот С. Р. за виенските медиуми, инаку Србин што бживее во зградата во која се случило злосторството.