Исчезна првата жена војник во ЈНА - сте ја виделе ли Лилјана?

Веќе 5 месеци нема ни трага ни глас од 55 годишната Лилјана Георгиева од беровско Мачево, која е првата жена војник во ЈНА од Малешевијата. Нејзиниот брат, кој живее сам во трошна куќичка во Мачево бара одговори, каде е неговата сестра, која била работник во фирма за обезбедување во Општина Берово, хуманитарен активиста во Црвениот Крст и крводарител со 190 пати подарена крв, објавува локалната телевизиска станица ТВ Стар.

Лилјана имала тежок живот. Таа останала без својата малолетна ќерка, откако и била одземена поради дисфункционалноста на семејството. Сега нејзините најблиски се прашуваат дали е убиена или самата посегнала по својот живот.

И соседите на Лилјана бараат одговори за нејзиното исчезнување. Колегите, пак, од фирмата за обезбедување не сакале да зборуваат за неа и само потврдиле дека во моментот на исчезнување, таа била на боледување.

И полицијата нe знае каде е беровчанката. Според штипската полиција, исчезнувањето на Лилјана е пријавено на 11. ноември 2013. Повеќе детали од истрагата не сакале да откријат, но, потенцирале дека полициски службеници работат на пронаоѓање на жената.