ЕУ под притисок: Атина, Букурешт и Софија ќе бараат компензација од ЕУ за скапата струја во регионот

Земјите од Југоисточна Европа, меѓу кои и Романија, Бугарија и Грција, се соочуваат со значително повисоки цени на електричната енергија во споредба со своите западноевропски соседи. Оваа состојба предизвикува сериозни социјално-економски проблеми за граѓаните и компаниите во регионот.

Романскиот министер за енергетика, Себастијан Бурдуја, јавно изрази незадоволство поради оваа состојба и најави дека ќе побара од Советот на ЕУ да преземе мерки за компензација. Според него, сушата, намаленото производство на хидроенергија и проблемите со интерконекцијата, како и поддршката за Украина и Молдавија, се главните причини за оваа нерамнотежа.

Грчкиот министер за енергетика, Теодорос Скилакакис, се согласи со неговиот романски колега и истакна дека единствениот европски енергетски пазар не функционира еднакво во сите делови на континентот. Тој најави дека Грција, заедно со Романија и Бугарија, ќе работи на создавање механизам за интервенција кој ќе ги штити граѓаните од екстремните цени на електричната енергија.