Перу прогласи вонредна состојба на границата со Еквадор

Немирите на Еквадор ја натераа перуанската влада да прогласи вонредна состојба долж границата со таа земја, додека Бразил, Колумбија и Чиле изразија поддршка за еквадорската влада, пренесува Ројтерс.

Еквадор се соочи со серија насилни инциденти во вторникот, вклучително и вооружени напаѓачи кои упаднаа во ТВ станица, додека претседателот Даниел Нобоа именуваше 22 банди како терористички организации и воени цели.

Полицијата уапси 13 вооружени лица кои ја презедоа телевизијата ТЦ за време на пренос во живо, додека на друго место беа киднапирани најмалку седум полицајци и имаше неколку експлозии низ целата земја.

Нобоа, кој ја презеде функцијата во ноември, ветувајќи дека ќе стави крај на насилството во трговијата со дрога, прогласи 60-дневна вонредна состојба во понеделникот како одговор на насилството.